Jákvætt að fyrri eigendur Innovate skili bréfum í Eimskip

Halldór Kristmannsson, framkvæmdastjóri samskiptasviðs Eimskips, segir það jákvætt að hafa náð samkomulagi við tvo af fyrrum eigendum Innovate um að þeir skili bréfum í Eimskip til baka líkt og tilkynnt var um í dag.

„Við erum ánægðir með að hafa lokið samningi við tvo af fyrrum eigendum Innovate og teljum þetta jákvæða niðurstöðu í ljósi aðstæðna. Frá því ljóst var að afskrifa þyrfti hlut okkar í Innovate hóf stjórn félagsins ítarlega skoðun á þessarri fjárfestingu og þeim forsendum sem lagðar voru til grundvallar kaupunum á síðasta ári. Niðurstaðan er samkomulag um að þeir skili öllum sínum bréfum aftur og höfum við þá náð til baka 2/3 af síðari fjárfestingu okkar í félaginu. Við munum nú halda áfram samskonar viðræðum við Peter Osborne um hans hlutabréf í félaginu en það er þó of snemmt að álykta um niðurstöðu í því máli," segir Halldór í samtali við Vísi.