Úrvalsvísitalan ekki lægri í nærri þrjú ár

Allmiklar lækkanir voru í Kauphöll Íslands í dag og lækkaði Úrvalsvísitalan um 1,99 prósent og stendur nú 4.512 stigum. Hefur hún ekki mælst lægri frá því í um miðjan október árið 2005.

Teymi leiddi lækkanirnar en hlutabréf í félaginu lækkuðu alls um 6,22 prósent. Félagið hefur lækkað um 10,3 prósent það sem af er viku. Skammt þar á eftir kom SPRON sem lækkaði um 6,13 prósent og þá lækkaði Bakkavör um 3,78 prósent og Exista um 3,54 prósent.

Ekki voru þó eintómar lækkanir í Kauphöllinni í dag því færeysku félögin Atlantic Airways og Föroya Banki hækkuðu, það fyrrnefnda um 3.3 prósent en það síðarnefnda um 1,89 prósent. Þá hækkaði Eimskip eilítið eða um 0,25 prósent.