Stærstu hluthafar FL Group og Exista hafa misst 100 milljarða

Stærstu hluthafar fjárfestingafélaganna FL Group og Existu hafa misst 100 milljarða af eignum sínum það sem af er þessu ári. Gengi beggja félaga hefur lækkað um meira en 40% á þeim tveimur og hálfa mánuði sem liðinn er af árinu 2008.

Gengi FL Group var 7,28 klukkan 15 í dag og hafði fallið um tæp 13% frá því að markaður opnaði í morgun. Gengi félagsins var 13,75 um áramót og hefur því fallið um rétt rúm 47% á þessum tveimur mánuðum. Stærstu hluthafar félagsins hafa fundið fyrir þessu gruni á gengi félagsins. Þannig hefur hlutur Baugur Group, sem á 36,5% hlut í félaginu, rýrnað um rúma 32 milljarða frá áramótum.

Exista hefur heldur ekki farið varhluta af hruni á mörkuðum. Gengi bréfa í félaginu hefur fallið um 43,45 frá áramótum og um rétt tæp 10% í dag. Um þrjú var gengi félagsins 10,5. Bakkabræðurnir Ágúst og Lýður Guðmundssynir eru langstærstu hluthafar Existu með rúmlega 45% hlut. Þeirra hlutur hefur lækkað um rúman 41 milljarð frá áramótum.

Eins og greint var frá hér á Vísi í morgun hafa eigendur FL Group uppi hugmyndir um að taka félagið af markaði á næstu vikum.