Byssumaður banaði fimm í ráðhúsi St. Louis

Byssumaður skaut fimm manns til bana í ráðhúsi St. Louis í Bandaríkjunum og særði fjóra, þar á meðal borgarstjórann, áður en lögregla skaut hann banaskoti. Byssumaðurinn var þekktur fyrir að hafa óbeit á borgarfulltrúum og embættismönnum borgarinnar. Samkvæmt upplýsingum lögreglu réðist byssumaðurinn inn á fund í ráðhúsinu og öskraði „Skjótið borgarstjórann!"

Mike Swoboda borgarstjóri Kirkwood hverfisins var fluttur alvarlega slasaður á sjúkrahús og liggur á gjörgæsludeild. Fréttamaður Suburban Journals slasaðist en var stöðugur að sögn talsmanns sjúkrahússins. Borgarlögmaðurinn John Hassel reyndi að stöðva árásarmanninn með því að henda að honum stólum en byssumaðurinn hélt þrátt fyrir það áfram að skjóta að fundarmönnum.

Fréttamaður sem var á fundinum fyrir St. Louis Post-Dispatch sagði að um 30 manns hefðu verið á fundinum sem byrjaði klukkan sjö í gærkvöldi, klukkan eitt í nótt að íslenskum tíma. Stuttu síðar hafi byssumaðurinn ráðist inn og hafið skothríð.

Lögregla hefur ekki gefið upp nafn byssumannsins, en fjölmiðlar segja hann vera Charles Lee „Cookie" Thorrnton sem er þekktur fyrir að trufla borgarfundi. Hann hafði nýlega tapað máli gegn einu úthverfa borgarinnar sem hann sagði áreita hann. Þá hafði hann tvisvar verið dæmdur fyrir ólæti og truflun á fundum í ráðhúsinu árið 2006.