Kaupþing ekki hætt við kaupin á NIBC

„Kaupþing stefnir að því að kaupa NIBC og bíður samþykkis Fjármálaeftirlitsins fyrir kaupunum," segir Jónas Sigurgeirsson, upplýsingafulltrúi hjá Kaupþingi. Sögusagnir hafa verið á kreiki í dag um að bankinn hyggðist hverfa frá kaupunum en Jónas segir ekkert hæft í þessu.

Áður hefur komið fram í fjölmiðlum að Kaupþing greiðir 1.392 milljónir evra eða 133,6 milljarða króna, auk 140 milljóna hluta í Kaupþingi fyrir bankann, en gengi bankans er nú 745 á hlut. Um er að ræða stærstu viðskipti Íslandssögunnar sem eiga sér stað í einum viðskiptagjörningi, að sögn forsvarsmanna bankans.