Icesave-peningar ekki til Marels

Inneignir Icesave-reikninga í Hollandi fóru ekki í að fjármagna kaup Marel Food Systems á Stork Food Systems.

Hörður Arnarson, forstjóri Marel Food Systems, segir fullyrðingar um annað í hollenska blaðinu Volkskrant vera rangar.

„Fyrst er á það að benda að kaupin voru að 50 prósentum fjármögnuð með eigin fé og svo með sambankaláni átta evrópskra banka,“ segir hann og bendir á að í ofanálag hafi fjármögnunin átt sér stað á síðasta ári, fyrir tilkomu Icesave.

Hörður segir þegar hafa verið farið fram á að aðrir hollenskir fjölmiðlar birti réttar upplýsingar um málið, en fréttin ranga var einnig tekin upp hér innanlands.