Fleiri en Seðlabankinn fái gert upp krónubréf

Engin haldbær rök liggja til stuðnings einkaréttar Seðlabanka Íslands að annast efndalok greiðslufyrirmæla vegna viðskipta með rafbréf í íslenskum krónum. Þetta segir í umsögn Viðskiptaráðs Íslands um breytingar á lögum um rafræna eignaskráningu verðbréfa.

Lögunum er verið að breyta til að lagaramminn heimili hér kauphallarviðskipti með hlutabréf í annarri mynt en krónum. Í kjölfar athugasemda Seðlabankans rétt áður en skrá átti hlutabréf Straums-Burðaráss í evrur síðasta haust var þeim áformum slegið á frest og vinna hafin við að kanna nauðsynlegar lagabreytingar. Breytt lög um rafræna eignaskráningu verðbréfa á að afgreiða á Alþingi núna í vor. Í haust er svo stefnt að því að Seðlabanki Finnlands taki að sér lokauppgjör evrubréfaviðskipta í Kauphöllinni hér.

Viðskiptaráð gerir hins vegar athugasemd við að Seðlabankinn hafi eftir sem áður einkarétt á uppgjöri viðskipta bréfa í krónum. „Þessi einkaréttur er hvorki rökstuddur í greinargerð frumvarpsins né í tillögum nefndar viðskiptaráðherra frá 19. desember 2007. Um efndalok greiðslufyrirmæla eiga að gilda sömu reglur óháð þeirri mynt sem um ræðir og þannig ætti verðbréfamiðstöðvum hér á landi að vera gert kleift að annast öll efndalok.“

Þá bendir Viðskiptaráð á að þótt frumvarpið geri bara ráð fyrir umsagnarrétti Seðlabankans með uppgjörskerfum fyrir verðbréf og greiðslur í fjármálaviðskiptum til Fjármálaeftirlitsins (FME) hafi bankinn í raun neitunarvald, því hann eigi jafnframt að gera tillögu að greiðslukerfi til ráðherra. Það muni bankinn ekki gera ef hann lýsi sig andsnúinn tilteknu greiðslukerfi. Viðskiptaráð leggur til að skýrðar verði fremur skyldur FME og Seðlabankans til samráðs vegna uppgjörsreglna verðbréfamiðstöðva. „Í ljósi einarðrar afstöðu Seðlabankans gegn upgjöri sem og skráningu hlutabréfa tiltekinna fyrirtækja í erlendum myntum og í ljósi hlutverks FME samkvæmt frumvarpi þessu“ kveðst Viðskiptaráð fremur telja að FME ætti að gegna formennsku í samráðsnefnd verðbréfamiðstöðva, kauphalla, Fjármálaeftirlitsins og Seðlabanka Íslands, fremur en Seðlabankinn líkt og kveðið er á um í lagabreytingafrumvarpinu. Nefnd þessi á að fjalla um samskipti þessara stofnana í tengslum við frágang viðskipta. „Nefndarfor­maður sem hefur engra hagsmuna að gæta í þeim samskiptum er betur til þess fallinn að auka trúverðugleika nefndarinnar,“ segir í áliti Viðskiptaráðs.

Aðrir sem sendu inn umsagnir gera við það litlar athugasemdir. Samtök atvinnulífsins árétta mikilvægi þess að „engar hömlur séu lagðar á skráningu og viðskipti með hlutabréf í íslenskum fyrirtækjum í erlendri mynt eða önnur verðbréf í erlendri mynt“.

Viðskiptanefnd Alþingis tekur í lok þessarar viku og byrjun næstu á dagskrá frumvarpið, en að sögn Ágústs Ólafar Ágústssonar, formanns nefndar­innar, er fastlega að því stefnt að Alþingi afgreiði breytingar á lögunum fyrir sumarfrí.