Stones Invest rúllar

Nú er komið á daginn að danska fjárfestingafyrirtækið Stones Invest er gjaldþrota. Það var viðskiptadómstóll í Danmörku sem úrskurðaði um þrotið í dag en áður hafði verið fallist á greiðslustöðvun í félaginu. Samkvæmt lögmanni félagsins skuldar Stones litla fjóra milljarða danskra króna og þar af eru lausaskuldir 2,5 milljarðar.

Þetta kemur fram á fréttavefnum danska Börsen, en þar segir að fjölmargir kröfuhafar í þrotabúið hafi verið mættir í réttinn. Á tímabili þurfti dómarinn að biðja kröfuhafa að róa sig þegar þeir reyndu að koma sínum kröfum á framfæri.

Á meðal helstu kröfuhafa í fyrirtækið má nefna Roskilde banka, Nordea og Eik banka, auk þess sem íslenska fyrirtækið Landic Property hefur krafist þess að fá 2,5 milljónir danskra endurgreiddar frá Stones í kjölfar þess að ekkert varð úr kaupum Stones á Keops development.