Fráskilinn Bjarni Haukur lélegur að skreyta

Einleikurinn „Pabbinn" var frumsýndur í Iðnó fyrir rúmu ári . Sýningin fékk strax gríðarlega góðar viðtökur hjá gagnrýnendum sem og áhorfendum.

Eftir rúmlega 50 troðfullar sýningar í Iðnó fluttist sýningin í Íslensku óperuna vegna vinsælda og fyrir þessi jól gefst íslensku þjóðinni einstakt tækifæri að eignast „Pabbann" á DVD.

Vísir hafði samband við Bjarna Hauk Þórsson leikara en hann er sjálfur pabbi, einstæður pabbi. Hann skildi við eiginkonu sína og barnsmóður fyrir tveimur árum.

„Það er mjög gott samkomulag hjá mér og barnsmóður minni. Það gæti ekki verið betra," svarar Bjarni Haukur aðspurður út í fjölskylduhagina en tekur sérstaklega fram að „Pabbinn" fjallar ekki um einstæða feður heldur upplifun karlmanna þegar nýtt barn kemur í heiminn og hvernig allt breytist.

Hvernig verða jólin hjá ykkur feðgum? „Þau verða bara frábær. Það er bara „family time" og þetta er nú voðalega klassískt. Við skreytum jólatréð. Annars kann ég ekkert að skreyta og er svakalega lélegur í öllu sem við kemur jólaskreytingum. Sonur minn kvartaði um daginn yfir þessu þannig að ég þarf að gera eitthvað í þessum málum. Hann verður fimm ára í janúar," segir Bjarni Haukur.

Samdir þú „Pabbann" út frá þinni eigin reynslu?

„Já, já og félögunum. En diskurinn er kannski ekki fyrir yngstu meðlimi fjölskyldunnar. Það er ekki alveg við hæfi þegar foreldrarnir tyggja hamborgarahrygginn og börnin spyrja yfir jólamatnum: Hvað eru eggjastokkar?"

„Það þarf að skýra það út fyrir þeim yngstu en „Pabbinn" er fyrir ömmu og afa og allt liðið. Fínt að sjá diskinn eftir jólasteikina," segir Bjarni Haukur að lokum.