Ný íslensk ferðaskrifstofa tekur til starfa

Ný íslensk ferðaskrifstofa, VITA, hefur nú tekið til starfa. Markmið VITA er að bjóða Íslendingum upp á fjölbreytt úrval skipulagðra afþreyingaferða, með tryggum flugkosti og framúrskarandi þjónustu á samkeppnishæfu verði. VITA er rekin af Iceland Travel, dótturfélagi Icelandair Group.

Helgi Eysteinsson framkvæmdarstjóri Iceland Travel og VITA segir að ferðaskrifstofan ætli að fara í samkeppni á ferðum til Kanarí og skíðaferðum til Ítalíu í vetur.

„Við byrjum á að fljúga vikulega frá desember til Gran Canaria sem er vel þekktur vetraráfangastaður og síðan frá miðjum janúar til Verona á Ítalíu," segir Helgi en ferðaskrifstofan ætlar sér stærri hluti þegar líða fer á sumarið og bæta við nýjum áfangastöðum.

Iceland Travel hefur aðallega verið í móttöku ferðamanna hingað til lands en ætlar nú að þjónusta íslendinga erlendis. En eru menn ekkert hræddir við samdrátt í utanlandsferðum á þessum tíma?

„Það má vel vera en það breytir því ekki að við teljum okkur vera með góða vöru í höndunum."

Flugvélar Icelandair eru notaðar auk þess em boðið er upp á þá nýjung að viðskiptavinir geta notað vildarpunkta í leiguflugunum.

„Það hefur vantað hingað til og eftirspurnin eftir því er mikil. Við leggjum áherslu á ferðir með tryggum flugkostum og gistingu í tiltölulega háum gæðaflokki á samkeppnishæfum verðum. Við verðum ekkert endilega ódýrastir, en viljum bjóða góða og öfluga þjónustu."