Tap Stoða 11,6 milljarðar króna

Stoðir (áður FL Group) töpuðu 11,6 milljörðum króna á öðrum ársfjórðungi. Á sama tíma í fyrra hagnaðist félagið um rétt rúma 8 milljarða króna. Heldur hefur dregið úr tapi félagsins milli ársfjórðunga en á fyrsta fjórðungi nam tap Stoða 47,8 milljörðum króna.

Í tilkynningu félagsins kemur fram að tapið nú skýrist einkum af fjármagnskostnaði og af lækkun á markaðsverðmæti eignarhlutar Stoða í Glitni banka. Tap vegna 32 prósenta hlutar félagsins í bankanum nemur 8,9 milljörðum króna. Vaxtagjöld nema 8,5 milljörðum.

Aðrar kjarnafjárfestingar Stoða eru í Baugi Group, Trygginga­miðstöðinni (TM) og Landic Property. TM og Landic skiluðu einnig uppgjöri í gær. Á fyrstu sex mánuðum ársins tapaði TM 130 milljónum króna, en Landic hagnaðist um 435 milljónir. Fram kemur að hagnaður af áframhaldandi starfsemi Landic á fyrri helmingi ársins nemi 5,4 milljörðum kóna.

FL Group var tekið af markaði í júníbyrjun og nafni þess breytt í Stoðir. Haft er eftir Jóni Sigurðssyni, forstjóra félagsins, að nýtt nafn sé rökrétt þar sem megnihlutverk Stoða sé að efla og styðja við kjarnafjárfestingar félagsins og veita kjölfestu til framtíðar.