Spá óbreyttri verðbólgu í maí

Greiningardeild Glitnis spáir því að vísitala neysluverðs hækki um 0,9 prósent milli apríl og maí og ársverðbólga verði því áfram 11,8 prósent.

Fram kemur í Morgunkorni Glitnis að reikna megi með að áhrifa vegna gengislækkunar krónunnar muni enn gæta í maí þó svo að stærsti kúfurinn sé liðinn hjá. Eldsneytisverð haldi áfram að hækka og margt bendi til þess að enn sé nokkur verðþrýstingur á matvörumarkaði sem enn hafi ekki skilað sér út í verðlag og nægir að nefna verð á mjólk og mjólkurvörum í því sambandi.

Greiningardeildin býst enn fremur við lítilsháttar verðlækkun á nafnverði húsnæðis á árinu en sú lækkun sé þó aðeins brot af þeirri hækkun sem átti sér stað á síðasta ári. „Við teljum líklegt að húsnæðisverð eins og Hagstofan mælir það muni lækka lítillega í maí og að markaðsverð húsnæðis lækki um tæplega 4% yfir árið og að lítilleg lækkun verði einnig á árinu 2009," segir í Morgunkorninu.

Býst við að verðbólga minnki hratt frá og með haustinu

Frá og með haustinu telur Glitnir að hratt muni draga úr árshraða verðbólgunnar og að hún verði nálægt átta prósentum í árslok og að 2,5 prósenta verðbólgumarkmið Seðlabankans náist um mitt næsta sumar.

„Forsendur þess að þetta gangi eftir eru fyrst og fremst þær að gengi krónunnar taki að hækka á ný í sumar og að krónan styrkist hægt og bítandi út spátímabilið. Jafnframt skiptir ró á vinnumarkaði miklu. Verði farið af stað með nýjar og meiri launakröfur en þegar hefur verð samið um eykst hættan á víxlverkun launa, verðbólgu og gengis en slíkt myndi óhjákvæmilega hafa aukna verðbólgu í för með sér," segir einnig í Morgunkorninu.