Róbert: Við hræðumst ekki Frakkana

Róbert Gunnarsson náði ekki að fara alla leið með strákunum inn í klefa að fagna því hann var gripinn í lyfjapróf. Vonandi hans vegna tekur það stutt af.

„Það er svekkjandi að geta ekki farið inn í klefa strax en svona er þetta," sagði Róbert brosandi. „Við erum að uppskera eins og við höfum sáð. Við höfum oft dottið út snemma óverðskuldað. Frá fyrstu sekúndu í dag vorum við klárir. Þetta var ótrúlegt. Ég ætla ekki að tala um dómarana en þeir reyndu að hjálpa Spánverjum. Við vorum aftur á móti klókir og spiluðum vel manni færri. Svo þegar það var jafnt í liðum áttu þeir ekki möguleika. Við vorum miklu betri," sagði Róbert sem er enn banhungraður.

„Við fögnum í klukkutíma og svo er bara nýr dagur. Það er eitt verkefni eftir og það er ekkert gaman að fara í úrslitaleik og skíta á sig. Við hugsum ekki þannig heldur ætlum við að sigra. Ef við undirbúum okkur af sömu kostgæfni þá hef ég engar áhyggjur. Við hræðumst ekki Frakkana," sagði Róbert.