Elmo væntanlegur á Reðursafnið

Sigurður Hjartarson, forstöðumaður Reðursafnsins á Húsavík var í forvitnilegu viðtali á BBC World Service í morgun. Þar fór hann yfir sögu þessa merkilega safns og minntist á mann nokkurn sem hefur ánafnað safninu getnaðarlim sinn. Fleiri hafa raunar gert slíkt hið sama og lofað Sigurði lim sínum eftir sinn dag, en Stan nokkur Underwood bætir um betur, því hann ætlar að senda Sigurði liminn áður en hann deyr. Stan er við hestaheilsu, um sextugt og limur hans gengur víst undir nafninu Elmo.

„Já já, hann er með þetta í undirbúningi", segir Sigurður í samtali við Vísi. „Aðgerðin verður víst framkvæmd á Ítalíu í haust og hann er búinn að finna lækni sem ætlar að framkvæma þetta." Sigurður segir að þeir Stan hafi verið í sambandi í á þriðja ár. „Stan kom sjálfur með þessa hugmynd en hann er víst mjög vel byggður", segir Sigurður og hefur eftir Stan að limurinn sé um sjö tommur að lengd. „Þetta er vænsti gripur og hann heitir víst Elmo. Stan var með átta húðflúr á Elmo sem hann er núna að láta fjarlægja með leysigeysla meðferð," segir Sigurður. „Að minni tillögu ætlar hann að láta gera stóran amerískan fána á tólið áður en það verður tekið af og sett á safnið."

Ef menn velta því fyrir sér hvað rekur Stan áfram í þessum leiðangri sínum segir Sigurður að hann hafi sagt sér að hann sé búinn að nota hann nógu mikið um æfina. „Hann er þrígiftur og jafn oft fráskilinn. Honum er afar hlýtt til Elmo og í þennan tíma sem ég hef þekkt hann hefur hann eiginlega ekki talað um annað en typpið á sér," segir Sigurður Hjartarson, forstöðumaður, sem bíður í ofvæni eftir nýjasta sýningargripnum.