Icelandair breytir áætlunum til að mæta eldsneytiskostnaði

Icelandair hefur ákveðið að gera breytingar á vetraráætlun næsta vetrar og draga úr framboði til þess að mæta auknum kostnaði vegna eldsneytisverðhækkana.

Í tilkynningu frá félaginu segir að helstu breytingar séu þær að vetrarhlé verður lengt í flugi til og frá Minneapolis og heilsársflugi til Toronto og Berlín er frestað.

Flug til og frá Toronto í Kanada hófst í vor og mun halda áfram vorið 2009 eftir vetrarhlé. Hlé var gert á flugi til Minneapolis á síðasta vetri og nú verður það hlé lengt veturinn 2008-2009 og stendur frá októberlokum fram í mars. Á síðasta vetri var ekki flogið til Berlínar og áformum um heilsársflug þangað hefur verið frestað. Fleiri breytingar hafa verið gerðar á vetraráætlun félagsins, meðal annars verður dregið úr flugi til Parísar en flug aukið til New York. Einnig verða felld út einstök flug á nokkrum leiðum.

Þeir farþegar sem áttu bókanir á þeim flugum sem felld hafa verið niður eru látnir vita og samkvæmt reglum um breytingar á áætlun er þeim boðin endurgreiðsla eða önnur ferðatilhögun.

"Við hjá Icelandair erum að bregðast við þessum gífurlegu hækkunum á eldsneyti eins og öll flugfélög í heiminum. Frá áramótum hefur flugeldsneytið hækkað um 60% og það hefur sexfaldast í verði á nokkrum árum. Bókunarstaða Icelandair er í raun góð, en eldsneytiskostnaðurinn veldur því að fækka verður flugum og auka nýtingu í hverju flugi. Við gerum þessar breytingar með góðum fyrirvara og látum alla farþega vita af breytingunni," segir Birkir Hólm Guðnason, framkvæmdastjóri Icelandair.