SÍ segir að greiðslumiðlun til og frá Bretlandi gangi betur

Seðlabanki Íslands segir að greiðslumiðlun til og frá Bretlandi gangi nú mun betur en áður. Hafa ber þó áfram í huga að greiðslur taka almennt lengri tíma að berast en áður en vandkvæðin komu upp fyrir um mánuði síðan.

Í tilkynningu á vefsíðu bankans segir að varðandi þær greiðslur sem berast í gegnum Seðlabanka Íslands þarf að huga sérstaklega að því að til að greiðslur til Íslands berist örugglega þarf greiðandinn í Bretlandi að vera með rétt greiðslufyrirmæli og fara fram á að greitt sé í gegnum reikning Seðlabanka Íslands (The Central Bank of Iceland) hjá National Westminster Bank.

„Ef nefnd eru nöfn þeirra lánastofnana sem lent hafa í sérstökum erfiðleikum getur það tafið eða hindrað greiðslu," segir í tilkynningunni.