16 mánaða fangelsisdómur Malakauskas stað­festur

Hæstiréttur staðfesti í dag dóm héraðsdóms yfir Litháanum Tomasi Malakauskas. Hann var dæmdur í 16 mánaða fangelsi fyrir að rjúfa endurkomubann með því að koma hingað til lands.

Hann átti 419 daga eftir af fyrri dómi og var tveimur mánuðum bætt við þann dóm. Fyrri dómur Tomsar er síðan 2004 en þá var hann dæmdur í fangelsi fyrir aðild sína í hinu svokallaða líkfundarmáli.

Þá faldi hann ásamt tveimur öðrum líkið af Vaidas Jucevicius í höfninni í Neskaupstað með 400 grömm af amfetamíni innvortis. Í kjölfarið á þeim dómi var hann dæmdur í 10 ára endurkomubann hingað til lands.

Tomas fékk reynslulausn þegar hann átti 14 mánuði eftir af fangelsisdómnum í líkfundarmálinu. Hann hins vegar rauf þessa reynslulausn með því að koma hingað til lands og verður því að afplána þá 14 mánuði sem hann átti eftir af fyrri dómi. Þegar tekið var mið af sakaferli taldi héraðsdómur rétt að dæma Tomas í 16 mánaða fangelsi.

Tomas kom hingað til lands í byrjun september á síðasta ári. Yfirvöld voru hins vegar lengi að átta sig á veru hans hér á landi þar sem hann hefur tekið upp annað eftirnafn og heitir nú Tomas Arlauskas. Hann á barn með íslenskri unnustu sinni.

Tomas rauf ekki bara endurkomubann þegar hann kom hingað til lands heldur var hann einnig gripinn með 26 grömm af amfetamíni.