Mikilvægt að halda rónni í erfiðu árferði

„Ég held að í svona árferði sé mjög mikilvægt að halda ró sinni. Menn þurfa að greina tímabundna erfiðleika frá lengri tíma vandamálum,“ segir Jónas Fr. Jónsson, forstjóri Fjármálaeftirlitsins (FME). Hann fór yfir stöðu fjármálafyrirtækja hér á fundi sem Félag um fjárfestatengsl hélt í gærmorgun í samstarfi við Háskólann í Reykjavík.

Jónas segir undirstöðu bankanna almennt vera traustar og afkomu þeirra góða síðustu ár. Jafnvel þótt frá væru dregnar óreglulegar fjármagnstekjur og einungis litið til arðsemi af kjarnastarfsemi þá segir hann bankana fyllilega standast samanburð við norræna banka. „Eiginfjárhlutfall þeirra er mjög sterkt og þeir geta staðist veruleg áföll.“ Flesta bankana segir hann geta bætt við útlánaáhættu því hún sé ágætlega dreifð og markaðsáhættu sé mætt með hærra eiginfjárhlutfalli en gangi og gerist hjá norrænum bönkum. Aukin­heldur segir Jónas að lækkun á gengi hlutabréfa bankanna hafi verið í samræmi við það sem gengur og gerist í nágrannalöndum okkar.

En þrátt fyrir að staðan sé almennt traust segir Jónas ýmis verkefni fram undan. „Að mínu viti snúa þau helst að fjármögnun og samþættingu á starfsemi bankanna milli landa.“

Í máli sínu beindi Jónas sjónum helst að stóru bönkunum þremur, enda segir hann þá skipta mestu fyrir fjármálastöðugleikann. „Þeir standast samanburð við norræna banka, bæði hvað varðar hagkvæmni og arðsemi af kjarnastarfsemi. Þannig hefur arður af fjármálastarfsemi að miklu leyti verið viðbót við tekjurnar af kjarnastarfseminni.“ Öðru máli segir hann gegna um sparisjóðina þar sem hagnaður af kjarnastarfsemi hafi ekki verið nægilega mikill og fyrst og fremst borinn uppi af markaðsverðbréfum. „Því má búast við meiri sveiflum í afkomu þeirra en hjá bönkunum.“