Magasin du Nord er hvorki gjaldþrota né til sölu

Carsten Fensholt talsmaður Magasin du Nord segir að verslunin sé hvorki gjaldþrota né til sölu. Mikill orðrómur hefur verið um þetta í Kaupmannahöfn eftir að Jón Ásgeir Jóhannesson sagði af sér sem stjórnarformaður Magasin og Illum í gær og vél jafnframt úr stjórninni.

Fjallað er um málið á vefsíðunni business.dk. Þar segir m.a. að orðrómur hafi verið um að Magasin hafi stöðvað kaup á nýjum vörum sem var einmitt ein af ástæðum þess að verslunarkeðjan Merlin var seld.

Carsten vísar þessum orðrómi á bug. Hann segir að eigendur Magasin hlakki til jólaverslunarinnar og séu á fullu við að kaupa inn vörur til hennar. "Við höfum þar að auki lagt fram pantanir fyrir vörur fyrir vorið og sumarið á næsta ári," segir Carsten. "Þetta gerum við yfirleitt í október þannig að allt er með eðlilegum hætti hjá okkur."

Hvað orðróminn um gjaldþrot varðar segir Carsten að hann sé sá ótrúverðugasti. "Það mátti kannski búast við slíku í framhaldi af Sterling og Merlin en þetta er algerlega úr lausu lofti gripið," segir Carsten. "Fyrirtækið hefur aldrei staðið betur."

Fram kemur í máli Carsten að á síðasta ári skilaði Magasin hagnaðí í fyrsta sinn síðan á níunda áratug síðustu aldar. "Við erum algerlega óháðir íslenskum bönkum og félögum, eru algerlega fjármagnaðir af dönskum aðilum og erum sjálfstætt starfandi félag. Við erum hvorki á leið í gjaldþrot né til sölu," segir hann.