Bretar flytja börn sín heim frá Pakistan

Bretar ætla að flytja heim öll börn sendiráðsstarfsmanna sinna í Pakistan eftir sprengjuárásina á Marriott hótelið í Islamabad í síðasta mánuði.

Fimmtíu og fimm manns létu lífið í árásinni.

Í tilkynningu frá breska utanríkisráðuneytinu segir að eftir að hafa yfirfarið öryggisráðstafanir í kjölfar árásarinnar hafi verið ákveðið að flytja börnin heim.

Sendiráð virðast verða sífellt vinsælli skotmörk hjá öfgasinnuðum múslimum. Danir hafa til dæmis nokkrum sinnum lokað sendiráðum sínum í múslimalöndum tímabundið undanfarin misseri.