Endalokin nær en talið var

Þrettán ára þýskur strákur hefur leiðrétt útreikninga bandarísku geimferðastofnunarinnar NASA. Og NASA hefur viðurkennt að hafa gert mistök.

Málið snýst um möguleikana á því að risaloftsteininn Apophis lendi á jörðinni árið 2036.

NASA hafði reiknað út að möguleikarnir væru 1/45000. Það segir hinn þrettán ára gamli Nico Marquardt að sé tveim núllum of mikið.

NASA hafi gleymt að taka inn í dæmið möguleikana á því að Apophis rekist á einhvern þeirra þúsunda gervihnatta sem eru á braut um jörðu.

Apophis fer fyrst framhjá jörðinni föstudaginn 13. apríl (O, oh) árið 2029. Ef loftsteinninn rekst þá á eitthvert af gervitunglunum hundraðfaldast líkurnar á því að hann rekist á jörðina árið 2036. Líkurnar verða þá 1/450.

NASA og Nico eru þó sammála um hvað gerist ef Apophis lendir á Atlantshafinu. Loftsteinninn er 320 metrar um sig, samsettur úr járni og iridium.

Þyngdin er 200 milljarðar tonna. Áreksturinn myndi valda gífurlegum flóðbylgjum sem myndu ekki aðeins eyða hafnarborgum heldur ná víða langt inn í land.

Rykský myndi umlykja jörðina um ófyrirsjáanlega framtíð.