SPRON og Exista lækkuðu mest í dag

SPRON og Exista lækkuðu um á sjötta prósent í viðskiptum í Kauphöll Íslands. Úrvalsvísitalan lækkaði um 1,5 prósent og stendur í 4.449 stigum.

Almennt má segja að rautt hafi verið um að litast í Kauphöllinni í dag. Nokkur félög hækkuðu þó, Alfesca þeirra mest eða um 2,26 prósent og Össur um 1,08 prósent.

Gengi hlutabréfa í SPRON lækkaði hins vegar mest, eða um 5,76 prósent en þar á eftir kom Exista með 5,32 prósenta lækkun. Þá lækkaði gengi bréfa í Bakkavör um 3,13 prósent og bréf í 365 hf. um 2,52 prósent.

Gengi krónunnar veiktist eftir mikla hækkun í gær. Nam hækkun gengisvísitölunnar 0,81 prósenti og veiktist gengi krónunnar sem því nemur. Evran kostar nú 126 krónur, pundið 159 krónur, dollarinn um 80 krónur og danska krónan tæpar 17 krónur.