Í öllu havarí-inu sem fylgja vill fermingum gleymist stundum raunveruleg ástæða þess að fermt er og hvað felst í þeirri helgiathöfn.
Til að minna á tilganginn og uppfræða fermingarbörnin er viðeigandi að gefa bækur sem fjalla um Jesú, biblíuna og trúarbrögð.
Ekki er síst mikilvægt á þessum síðustu og verstu að fermingarbörnin sem fulltrúar framtíðarinnar geri sér grein fyrir áhrifum trúarbragða og sinni sérstöku trú og átti sig á hvað þau eigi sameiginlegt með öðrum borgurum heimsins.
Nauðsynlegt er að reyna að skilja fólk sem hefur öðruvísi bakgrunn en við sjálf til að lifa í sátt og samlyndi í þessum heimi sem við öll byggjum. Sum börn fermast borgaralegri fermingu og eru þá ekki að játa trú sína á Krist en engu síður er mikilvægt fyrir þau að átta sig á áhrifum trúarbragða á heiminn og kynnast sögunni.
Þessar bækur eiga því erindi til allra – fermdra sem ófermdra, ungra sem aldinna. Bækurnar fást allar í bókaversluninni Iðu.
