Hermönnum skilað

Skæruliðar Kúrda létu í morgun lausa átta tyrkneska hermenn sem þeir tóku höndum í umsátri í síðasta mánuði. Óvíst er hvort það dugar til að koma í veg fyrir innrás Tyrkja í Norður-Írak.

Hermennirnir voru teknir höndum í umsátri í Tyrklandi, nærri landamærunum að Írak. 12 hermenn féllu í átökum sem þá blossuðu upp. Hermennirnir átta voru afhentir fulltrúum héraðsstjórnar Kúrda í Norður-Írak. Þeir munu við góða heilsu og ómeiddir. Flogið verður með þá til Tyrklands í dag.

Hermennirnir eru látnir lausir tæpum sólahring eftir að íraska ríkisstjórnin tilkynnti að tekið yrði hart á skæruliðum Kúrda og skrifstofum samtaka þeirra - PKK - var lokað. Hundrað þúsund tyrkneskir hermenn bíða nú við landamærin að Írak eftir skipun um að ráðast inn í landið og herja á skæruliðana sem hafa fellt tugi Tyrkja í árásum yfir landamærin síðustu vikur.

Tyrkir krejast þess að leiðtogar PKK verði handteknir og ekki útséð með að þeir geri árás. Kúrdar hafa í rúma tvo áratugi barist fyrir sjálfstæðu ríki í suð-austur Tyrklandi.

Erdogan, forsætisráðherra Tyrklands, fundar á morgun í Washington með Bush Bandaríkjaforseta. Bandaríkjamenn og Írakar hafa þrýst mjög á Tyrki að láta ekki verð af árás - tryggja þurfi stöðugleika í þeim eina landshluta Íraks þar sem friður hafi að mestu ríkt.