Góður endasprettur tryggði Snæfelli sigur

Snæfell gerði góða ferð í Hveragerði í kvöld þar sem liðið lagði Hamar 77-70 í Iceland Express deild karla í körfubolta. Heimamenn höfðu betur í fyrri hálfleik en Hólmarar tryggðu sér sigur með því að halda Hamarsmönnum í aðeins 8 stigum í lokaleikhlutanum.

Leikstjórnandinn Justin Shouse var atkvæðamestur hjá Snæfelli og skoraði 26 stig og gaf 7 stoðsendingar. Sigurður Þorvaldsson skoraði 16 stig og hirti 8 fráköst og Hlynur Bæringsson skoraði 11 stig og hirti 9 fráköst.

Friðrik Hreinsson var atkvæðamestur hjá Hamri með 21 stig og George Byrd skoraði 16 stig og hirti 12 fráköst.

Snæfell hefur nú unnið tvo síðustu leiki sína í deildinni eftir þrjú töp í röð í upphafi móts, en Hamar hefur unnið einn af fyrstu fimm leikjum sínum og er á meðal botnliðanna í deildinni.