Paris Hilton á að hefja afplánum 5. júní

Paris Hilton var í gær dæmd til fjörutíu og fimm daga fangelsisvistar í Los Angeles fyrir að hunsa skilorðsbundinn dóm sem hún hlaut fyrir ölvunarakstur. Samkvæmt dómnum á hún að hefja afplánun eftir mánuð.

Það var hálfgjört fjölmiðlafár fyrir utan dómshúsið í Los Angeles í gær þegar dómur var kveðinn upp yfir Paris Hilton. Paris er ekki óvön því að slegist sé um að taka myndir af henni en hún hefur verið áberandi í fjölmiðlum síðustu árin og þá einna helst fyrir villt skemmtanalíf sitt og það eitt að vera Paris Hilton. Hún er tuttugu og sex ára og erfingi að Hilton hótelkeðjunni.

Í september í fyrra var hún handtekin fyrir ölvunarakstur en áfengismagn í blóði hennar mældist 0,8 prómill. Í janúar á þessu ári fékk hún þriggja ára skilorðsbundinn dóm fyrir brotið auk þess sem dómari skipaði henni að sækja áfengisnámskeið og greiða sekt. Hún hafði skömmu áður verið stöðvuð af lögreglunni fyrir að aka próflaus.

Í lok febrúar hafði lögreglan svo aftur afskipti af henni þar sem hún ók of hratt og án þess að hafa ljósin á en þar með rauf hún skilorðið.

Hilton hélt því fram fyrir rétti að hún hefði ekki gert sér grein fyrir því að hún hefði misst ökuleyfi sitt þrátt fyrir að hafa undirritað skjal þess efnis hjá lögreglunni í janúar.

Hún sagðist vera miður sín út af þessu öllu og að framvegis myndi hún fylgjast betur með. Foreldrar Parisar, Rick og Kathy Hilton, voru viðstaddir dómsuppkvaðingu. Móðir hennar greip andann á lofti þegar dómarinn las upp úrskurðinn og lögmaður hennar, Howard Weitzman, sagði niðurstöðuna fáránlega og tilhæfulausa. Hér væri verið að ráðast gegn Paris Hilton persónulega, vegna þess hver hún væri. Málinu verður áfrýjað en samkvæmt dómnum á Paris að hefja afplánun 5. júní næstkomandi.