Tyson gengst við dópákærum

Fyrrum heimsmeistarinn í þungavigt, Mike Tyson, hefur viðurkennt fyrir rétti að hafa ekið undir áhrifum fíkniefna í Arizona í fyrra. Hann hafði upphaflega neitað ákærum en viðurkenndi allt fyrir rétti í dag. Lögmaður hans segir Tyson hafa nú hafa verið edrú í 8 mánuði eftir meðferð við kókaínfíkn.

Tyson sat í fangelsi í þrjú ár frá árinu 1992 eftir að hafa verið fundinn sekur um nauðgun og sat aftur inni árið 1999 vegna líkamsárásar. Verði hann fundinn sekur að þessu sinni gæti hann átt yfir höfði sér rúmlega fjögurra ára fangelsisvist.

Hann var handtekinn í desember á síðasta ári eftir að hafa nærri ekið bíl sínum utan í lögreglubíl í Scottsdale í Arizona. Hann var þá í kókaínvímu og einnig fundust merki á honum um kannabisneyslu. Dómur verður kveðinn upp í málinu þann 19. nóvember nk.