REI ætlar að verða leiðandi á heimsvísu

„Orkusviðið er vinsælt hjá fjárfestum um allan heim en ég held að við Íslendingar höfum ákveðið forskot þegar kemur að þekkingu á jarðhita, og það þurfum við að nýta hratt,“ sagði Bjarni Ármannsson, nýr stjórnarformaður Reykjavík Energy Invest (REI), að loknum kynningarfundi fyrirtækisins í gær.

Bjarni og Guðmundur Þóroddsson, forstjóri Orkuveitunnar og starfandi forstjóri REI, sögðu félagið standa frammi fyrir miklum tækifærum og það ætlaði sér að verða leiðandi á heimsvísu á sviði nýtingar jarðvarma.

Orkuveita Reykjavíkur verður kjölfestufjárfestir í félaginu með 40 prósent hlutafjár en félagið stefnir að því að afla um 50 milljarða króna, frá innlendum og erlendum fjárfestum, til þess að ráðast í verkefni á sviði nýtingar jarðhita í heiminum. Bjarni hefur sjálfur lagt 500 milljónir króna í félagið.

Er Bjarni var forstjóri Glitnis kom hann að stofnun Geysir Green Energy sem einnig starfar á sviði nýtingar jarðvarma en það félag er í eigu FL Group, Atorku, Glitnis, VGK Invest ehf., Bar Holding og Reykjanesbæjar. Hann segist ekki líta svo á að þessi félög verði í harðri samkeppni. „Tækifærin á sviði nýtingu jarðvarma í heiminum eru það stór og mörg að hvorki Reykjavík Energy Invest né Geysir Green Energy munu ná utan um þau. En við eigum í samstarfi sem gengur vel,“ sagði Bjarni.

REI á hlut í Enex, Enex-Kína, Galantaterm og Iceland America Energy en fjölmörg verkefni á sviði jarðhitavirkjana eru skoðun hjá þessum félögum. Þá er PNOC-EDC, stærsta orkufyrirtæki á Filippseyjum, að vinna að verkefnum með REI en það fyrirtæki er nú í einkavæðingarferli, sem forsvarsmenn REI fylgjast grannt með.

Bjarni segir fjölmörg verkefni bíða stjórnar nýs fyrirtækis en auk hans eiga Björn Ingi Hrafnsson, varaformaður stjórnar Orkuveitunnar, og Haukur Leósson, formaður stjórnar Orkuveitunnar, sæti í stjórn REI.

„Fyrstu skrefin fara í að ná utan um verkefnin sem við erum með og átta sig á því hvernig þeim er best fyrir komið. Það þarf að búa til stefnu sem gerir það að verkum að fyrirtækið geti orðið leiðandi á heimsvísu á þessum markaði. Það þarf að gerast hratt vegna þess hve áhugi fjárfesta í heiminum á þessum málum er mikill. Með skýrri stefnu ættum við að geta laðað til okkar áhugaverða fjárfesta og það er okkar markmið.“