Tryggðu sjálfstæði Wall Street Journal

Jón Aðalsteinn Bergsveinsson

skrifar

Stjórnir bandarísku fjölmiðlasamsteypanna Dow Jones & Co. og News Corporation, sem eru í eigu ástralska auðkýfingsins Ruperts Murdoch, náðu í síðustu viku samkomulagi sem tryggir ritstjórnarlegt sjálfstæði bandaríska dagblaðsins Wall Street Journal. Með því er stærstu hindruninni fyrir yfirtökutilboði Murdochs í Dow Jones & Co. rutt úr vegi.

Dow Jones & Co. er móðurfélag samnefndrar fréttaveitu og dagblaðsins Wall Street Journal. Félag Murdochs gerði tilboð upp á fimm milljarða dala, jafnvirði 320 milljarða íslenskra króna, í útgáfufélagið í byrjun maí. Bancroft-fjölskyldan, sem fer með ráðandi hlut í Dow Jones, var mótfallin tilboðinu. Fjölskyldan, sem er geysistór og dreifð um allar jarðir vestanhafs, hefur hins vegar lítið viljað tjá sig um málið. Sumir úr ættinni hafi engu að síður verið áhugasamir um boðið á meðan aðrir voru því andsnúnir. Nokkrir úr Bancroft-fjölskyldunni sitja í stjórn Dow Jones & Co. Þeim mun hafa leiðst þófið, tekið ráðin af ættingjum sínum og fundað með Murdoch.

Fréttastofan Associated Press segir að nánari útlistanir á samkomulaginu liggi ekki fyrir. Þrátt fyrir þetta brást starfsfólk Wall Street Journal ókvæða við fréttunum. Það neitaði að mæta til vinnu á fimmtudag og sagði að ritstjórnarlegu sjálfstæði blaðsins, sem varað hafi í áratugi, væri ógnað með yfirtökutilboði fjölmiðlasamsteypu Murdochs. Þá er skerðing á réttindum og kjörum starfsmanna. Blaðamenn og starfsfólk útgáfufélagsins, sem eru 2.000 talsins, sögðu í bréfi sem það sendi yfirstjórn Dow Jones, að á meðan líklegt þyki að framkvæmdastjórar útgáfufélagsins komi til með að njóta góðs af yfirtökunni þá sé hætt við að blaðamenn og annað hæft starfsfólk yfirgefi skrifstofur blaðsins.

Tilboð Murdochs, sem lagt var fram í byrjun maí, hljóðaði upp á 60 dali á hlut. Þrátt fyrir orðróm um að hærra boðs sé að vænta hefur Murdoch lítið viljað gefa upp um slíkt en ítrekað ágæti útgáfufélagsins og fréttaveitunnar, sem reiknað er með að hann nýti í nýrri viðskiptasjónvarpsstöð sem hann hyggst setja á laggirnar undir lok árs auk þess sem stefnt sé að því að láta veitur Dow Jones & Co. styðja við núverandi fréttastöðvar fjölmiðlasamsteypu Murdochs, svo sem fréttastofu Sky.

Fréttastofa Reuters segir litlar líkur á að Murdoch hækki tilboð sitt, sem var 65 prósentum yfir meðalgengi í félaginu á tilboðsdegi. Aðrir fjölmiðlar taka í sama streng og segja það gott. Gengi bréfa í Dow Jones & Co. hefur stigið hratt síðan Murdoch lagði boðið á borðið og stendur nú nálægt 59 dölum á hlut.