Björgólfur hafnar því að hafa þrýst á borgarstjóra vegna REI

Björgólfur Guðmundsson hafnar því að hafa þrýst á Vilhjálm Þ. Vilhjálmsson um að flýta sameiningu Reykjavík Energy Invest og Geysis Green Energy

DV greindi í dag frá orðrómi um að Björgólfur Guðmundsson, formaður bankaráðs Landsbankans, hafi þrýst á Vilhjálm Þ. Vilhjálmsson, borgarstjóra, um að flýta samningum um sameiningu Reykjavíkur Energy Invest og Geysis Green Energy til þess að laga "... fjárhagsstöðu Hannesar gagnvart bankanum" eins og segir í blaðinu en Hannes Smárason er forstjóri FL Group sem er einn af stærstu hluthöfum í Geysi Green Energy.

Björgólfur Guðmundsson segir að aðdróttanir DV um afskipti hans að máli þessu séu algjörlega útí hött. Hann hafi enga vitneskju haft um sameiningu Reykavík Energy Invest og Geysir Green Energy fyrr en tilkynnt hafi verið um hana í fjölmiðlum.

Í yfirlýsingu frá Björgólfi segir að vinnubrögð DV í þessu máli séu vítaverð þar sem blaðið hafi hvorki leitað til Landsbankans né skrifstofu Björgólfs Guðmundssonar áður en blaðið birti ósannindi sem geti skaðað orðspor og hagsmuni Landsbankans og Björgólfs Guðmundssonar bæði hér heima og erlendis. Bankinn sé undir ströngu eftirliti fjármálayfirvalda í hverju því landi sem hann starfi auk alþjóðlegra matsfyrirtækja.