Forstjóri OR leyfði kaup Bjarna í REI

Hjörleifur B. Kvaran forstjóri Orkuveitu Reykjavíkur, samþykkti laun Bjarna Ármannssonar og heimild hans til kaupa á 500 milljóna króna hlut á sérkjörum.

Frumkvæðið að aðkomu Bjarna að Reykjavík Energy Invest (REI) hafði Haukur Leósson, stjórnarmaður í félaginu og stjórnarformaður Orkuveitunnar. Hluthafafundur sem var haldinn í REI áður en Bjarni Ármannsson keypti hlut í fyrirtækinu.

Hluthafi í fyrirtækinu var þá einn aðili, Orkuveita Reykjavíkur, og handhafi

þess hlutar var starfandi forstjóri Orkuveitunnar, Hjörleifur B. Kvaran. Í þáverandi stjórn REI voru Björn Ársæll Pétursson stjórnarformaður,

Björn Ingi Hrafnsson og Haukur Leósson. Stjórnarmenn REI voru áheyrnarfulltrúar á hluthafafundinum.

Haukur Leósson segir að hann hafi leitað til Bjarna um að taka að

sér starfið. „Ég hringdi í hann og bað hann að hitta mig. Ég sagði honum að okkur vantaði nýjan stjórnarformann og hann hugsaði málið í rúma viku og sló svo til." Haukur kynnti fyrirtækið fyrir Bjarna og þeir sömdu um laun hans. Haukur segir að honum finnist þau mjög sanngjörn.

Borgarstjóri var síðan upplýstur um það sem fór þeim á milli en Björn Ingi Hrafnsson, annar stjórnarmaður í REI, var upplýstur um þetta „löngu seinna," segir Haukur.

Um sérkjör nokkurra starfsmanna Orkuveitunnar segir Haukur að þeir hafi fengið þau því þeir hafi átt að fara til starfa hjá REI. Fleiri starfsmenn áttu þó upphaflega að fá að kaupa hlut. Spurður hvers vegna til dæmis upplýsingafulltrúi Orkuveitunnar, Eiríkur Hjálmarsson, hafi átt að fá heimild til kaupa, segir Haukur:

„[Fyrirtækin] voru svo samtvinnuð þangað til núna." Upplýsingafulltrúinn hafi einfaldlega sóst eftir kaupunum, „enda sjá allir hvað þetta er flott

fyrirtæki". Hjörleifur B. Kvaran sóttist einnig eftir því að fá að kaupa hluti í REI. „En okkur fannst ekki rétt að stjórnendur Orkuveitunnar eða stjórnarmenn REI ættu hlut í fyrirtækinu, það væru of náin tengsl," segir Haukur.

Haukur segir að fyrsti fundur nýrrar stjórnar REI verði í næstu

viku. Þegar hafi verið ákveðið að Bjarni Ármannsson verði stjórnarformaður í nýrri stjórn, Orkuveitan fái tvo stjórnarmenn og nýir hluthafar, FL-Group og Atorka, fái tvo. Að sögn Hauks er ekki búið að ákveða hverjir verða stjórnarmenn. Ekki náðist í Hjörleif B. Kvaran í gær.