Forstjóri Lánasýslu ríkisins lætur af störfum

Forstjóri Lánasýslu ríkisins, Þórður Jónasson, hefur óskað eftir lausn frá embætti og hefur jafnframt óskað eftir því að lausnin verði veitt hið fyrsta. Eftir því sem fram kemur í tilkynningu frá fjármálaráðuneytinu féllst fjármálaráðhherra á að Þórður hætti þann 10. apríl og hefur Sigurður G. Thoroddsen, lögfræðingur hjá Lánasýslu ríkisins, verið skipaður til þess að gegna starfi forstjóra Lánasýslu ríkisins á tímabilinu 11. apríl til 1. ágúst næstkomandi.

Í samtali við fréttastofu sagði Þórður að hann væri að hætta til þess að taka við starfi sem forstöðumaður fjármögnunar hjá nýstofnuðum fjárfestingarbanka, Askar Capital.