Dagur fyrir Ítalíu

Viðskipti og samskipti milli Íslands og Ítalíu hafa aukist jafnt og þétt á undanförnum árum. Margir telja þó að enn búi ýmsir óleystir kraftar landanna á milli. Íslensk-ítalska viðskiptaráðið hefur það að markmiði að efla og styrkja viðskiptatengsl milli Ítalíu og Íslands.

Er hlutverk þess meðal annars að vaka yfir viðskiptalegum hagsmunum félaga sinna, skipuleggja heimsóknir aðila úr viðskiptalífi annars ríkisins til hins og aðstoða við að koma á tengslum milli fyrirtækja. Þessu til viðbótar stendur ráðið reglulega fyrir fundum og ráðstefnum um málefni er tengjast viðskiptum milli landanna. Einn slíkur var haldinn í síðustu viku þegar ítalska viðskiptadeginum var fagnað á fjórtándu hæð í Húsi verslunarinnar.

Á fundinum fjallaði Guðrún Sigurðardóttir hjá Islandtours Lecco um markaðssetningu Íslands fyrir Ítali. Hún sagði ítalska ferðamenn hérlendum ferðamannabransa afar verðmæta. Á síðasta ári hefðu níu þúsund ítalskir ferðamenn komið til landsins. Upp til hópa keyptu þeir dýrari pakkaferðir en aðrar Evrópuþjóðir, auk þess sem þeir spöruðu iðulega lítið við sig á meðan á dvölinni stæði.

Guðrún segir marga Ítali vita lítið um Ísland. Sökum þessa skorts sé grunn­markaðsvinna nauðsynleg á Ítalíu. Sú vinna hefur farið fram í samstarfi við aðrar íslenskar ferðaskrifstofur, Iceland­air og aðra hagsmunaaðila. Þá kemur Ferðamálastofa einnig að markaðsstarfi í landinu þótt hún reki ekki skrifstofu þar. Það sagði Guðrún afar mikilvægt að yrði í framtíðinni, til að Ísland gæti verið samkeppnishæft við hin Norðurlöndin, sem öll reka ferðamálastofur á Ítalíu. Þá kallaði hún eftir aukinni samvinnu milli íslenskra fyrirtækja sem eiga í viðskiptum við Ítalíu því mikil þörf væri á að kynna Ísland frekar á Ítalíu.

Á Ítalíu eru starfrækt fjölmörg svæðis­bundin markaðs- og sölusamtök smárra og meðalstórra fyrirtækja, sem er meira um þar í landi en víðast hvar annars staðar. Samtök af þessu tagi eru vettvangur fyrir framleiðendur á sama atvinnusvæði. Þau gegna gríðarmikilvægu hlutverki fyrir lítil fyrirtæki sem oft hafa litla sem enga burði hafa til að koma sér á framfæri sjálf. Roberto Santini, talsmaður viðskiptaráðs Grosseto í suðvesturhluta Toscana-héraðs á Ítalíu, fjallaði á fundinum um mikilvægi slíkra samtaka. Þá sagði hann frá nýlegum samningi sem markaðs- og sölusamtök Grosseto hafa gert við Hagkaup um sölu á vörum héraðsins undir vörumerkinu Ítalía. Samtök af þessu tagi hafa gert það að verkum að smáfyrirtæki í ítölskum sveitum hafa landað stórsamningum við alþjóðlegar keðjur, sem hefði verið nánast ómögulegt án samtakanna.

Eygló Ólafsdóttir, útflutningsstjóri hjá ítalska matvælaframleiðandanum Saclà, fjallaði á fundinum um líkindin og ólíkindin með Íslendingum og Ítölum. Hún sagði margt ólíkt í hegðun og gildum Íslendinga og Ítala, sem kæmi meðal annars fram í hvernig þeir rækju fyrirtæki. Sagði hún Íslendinga geta lært ýmislegt af Ítölum, meðal annars þegar kæmi að því að vernda þjóðarhefðir sínar. Taldi hún að aukin samskipti milli landanna myndu hagnast báðum löndum vel, svo lengi sem Íslendingar væru tilbúnir að leggja á sig að læra ítölsku. Annað dygði ekki til ætlaði fólk að hasla sér völl í landinu.

Mario De Paoli, forstöðumaður hjá ítalska verktakafyrirtækinu Impregilo, sem sér um byggingu Kárahnjúkastíflu, fjallaði um starf fyrirtækisins hér á landi. Lýsti hann meðal annars þeim áskorunum sem fylgdu því að koma upp 1.500 manna alþjóðlegu þorpi með allri þjónustu á þessu afskekkta svæði. Þá sagði Mario skrif íslenskra fjölmiðla um Impregilo oft á tíðum óvægin og jafnvel ósönn. Það hefði gert það að verkum að fyrirtækið færi varlega í samskiptum sínum við fjölmiðla.

Þær Valgerður Sverrisdóttir utanríkis­ráðherra og Rosa Anna Coniglio Papalia, sendiherra Ítalíu á Íslandi, ávörpuðu einnig fundinn. Hvatti sendiherrann meðal annars íslenska fjárfesta til að beina sjónum sínum frekar að Ítalíu.