Búa til tækifæri í heimabyggð

Með stofnun vísindagarða og rannsóknarseturs í Skagafirði standa vonir til þess að efla atvinnulíf og bjóða ungu fólki atvinnu við hæfi í heimabyggð.

Verið Vísindagarðar ehf. er nýtt fyrirtæki sem annast rekstur kennslu- og rannsóknaraðstöðu í tengslum við Háskólann á Hólum, Matís og fleiri. Í dag fer fram ráðstefna milli fjögur og sex þar sem starfsemin verður kynnt. „Þetta er heilmikil uppákoma hér í húsnæði Versins á Háeyri 1,“ segir Gísli Svan Einarsson, nýráðinn framkvæmdastjóri, en Verið var stofnað í janúar. „Hér verða meðal annars kynnt nýsköpunarverkefni, sjávarútvegsráðherra heldur tölu og svo verður fjallað um framtíð Versins.“

Verið starfar nú í 1.500 fermetra húsnæði þar sem fyrirferðarmest er starfsemi Háskólans á Hólum og fyrirtækisins Iceprotein. „Hér verður til vettvangur og aðstaða fyrir samstarf skóla, rannsóknaraðila og atvinnulífs líkt þótt hefur skila árangri erlendis,“ segir Gísli. Hann segist finna fyrir miklum áhuga á starfseminni og þegar sé farið að huga að stækkun húsnæðis Versins. „Við teljum hér vera kjöraðstæður fyrir vísindasamfélag sem getur styrkt bæði samfélagið, frumkvöðlastarf og frekari þróun fyrirtækjanna.“