Tapaði 120 þúsundum á lottói sem hann hafði aldrei spilað í

Íslendingur tapaði nýlega 120 þúsund krónum, eftir að honum hafði verið tilkynnt um vinning í spænsku lottói sem hann hafði aldrei spilað í.

Algengt er að fólk láti glepjast af gylliboðum erlendis frá, sem síðan reynast vera frá fjárplokkurum af verstu gerð, segir Grímur Grímsson, aðstoðaryfirlögregluþjónn hjá embætti Ríkislögreglustjóra. Lögreglan hefur margoft sent frá sér viðvaranir vegna slíkra mála, en engu að síður gengur fólk í gildruna.

Að sögn Gríms hefur helst borið á þrenns konar svikatilraunum. Þekkt eru svokölluð Nígeríubréf, þar sem menn þykjast vera með arf sem þeir þurfi að koma úr landi og bjóða gylliboð, gegn „smávægilegri“ fjárhagsaðstoð. Einnig eru hlutabréfasvik kunn en í slíkum tilvikum er fólki boðið að kaupa hlutabréf í erlendum fyrirtækjum á hagstæðu verði með loforðum um skjótfenginn gróða.

Hið nýjasta er svo spænska lottóið El Gordo, sem vissulega er til á Spáni, en algerlega óviðkomandi svikahröppunum. Þeir senda tölvupóst til fólks þar sem því er tilkynnt að það hafi verið dregið út sem vinningshafar í lottóinu. Fólki er sagt að það hafi unnið milljónatugi, en þurfi að borga skatta og skyldur erlendis til að fá vinninginn.