Þrír keppa um uppgjör evruhlutabréfa

Óli Kristján Ármannsson

skrifar

Deutsche bank kemur samkvæmt heimildum Markaðarins til greina sem uppgjörsbanki í lok viðskiptadags vegna evruskráningar hlutabréfa hér. Sérstök samráðsnefnd vinnur að því að finna lausn á því hvernig haga á uppgjöri vegna fyrirtækja Kauphallarinnar sem kjósa að skrá bréf sín í evrum.

Þórður Friðjónsson, forstjóri Kauphallarinnar, segir þrjár leiðir færar, en eitt fyrirtæki hefur þegar tekið ákvörðun um að fara þessa leið og fleiri undirbúa hana. „Í fyrsta lagi væri hægt að fá að erlendan banka og koma þar ýmsir til greina, þar á meðal Deutsche bank. Síðan hefðum við líka getað farið leið í gegnum Danmörku þar sem við erum þegar með tengingu við dönsku verðbréfaskráninguna og yrði þá uppgjörið í evrum í Seðlabankanum þar.

Loks er síðan sú leið að Seðlabanki Íslands tæki verkefnið að sér, en það væri trúlega að mörgu leyti hagfelldasta leiðin. Hins vegar á eftir að fara vandlega yfir þetta,“ segir Þórður og kveður mest um vert að búa þannig um hnúta að tryggilega sé að málum staðið.

Seðlabankinn taldi fyrst í stað að hann hefði ekki heimild til að gera upp í annarri mynt en krónum. Guðmundur Kr. Tómasson, staðgengill framkvæmdastjóra fjármálasviðs Seðlabankans og formaður samráðsnefndar um samskipti verðbréfamiðstöðva, Kauphalla og Seðlabanka Íslands, segir uppgjörsmál í tengslum við evruskráningu hlutabréfa enn í skoðun og ákvörðun í málinu liggi ekki fyrir. Meðal annars segir hann verið að skoða mögulegt uppgjör innanlands, annaðhvort með aðkomu Seðlabankans eða innlends viðskiptabanka. „Verði sú leið farin þarf að tryggja að þetta uppfylli þær kröfur sem gerðar eru til uppgjörskerfa,“ segir hann.

Uppgjörskerfi sem þessi eru tiltölulega flókin og vakna spurningar um hvort rekstur þess yrði hagkvæmur nema mörg fyrirtæki ákvæðu að færa bréf sín í evrum. Hin leiðin væri þá að færa uppgjörið úr landi.

Hluthafar Actavis hafa þegar samþykkt að færa hluta bréfa sinna yfir í evrur. Þá verður á aðalfundi Marels í mars lögð fyrir hluthafa á aðalfundi beiðni um að færa hlutafé í evrur. Friðrik Jóhannesson, forstjóri Straums-Burðaráss Fjárfestingabanka, sagði nýverið á fundi að líklegt mætti telja að á aðalfundi bankans yrði farið fram á heimild til evruskráningar.

Þá hefur Exista sótt um leyfi til ársreikningaskrár um að gera upp í evrum og ætlar að sækja á fundi hluthafa heimild til að færa hlutafé yfir í evrur. Þar á bæ hefur hins vegar ekki verið tekin ákvörðun um hvort heimildin verður nýtt.