Cleese ódýrari en Orkuveituauglýsingin

Auglýsing Kaupþings með breska stórleikaranum John Cleese vakti mikla athygli á gamlárskvöld enda frumsýnd á eftirsóttasta tímanum í íslensku sjónvarpi, var síðasta auglýsingin fyrir Áramótaskaup Ríkissjónvarpsins.

Eitthvað hafa menn verið að velta því fyrir sér hvað kosti að fá leikara í þessum gæðaflokki til að leika í auglýsingu og skrifar almannatengillinn Ómar R. Valdimarsson á bloggsíðu sinni að hún hafi ekki kostað undir áttatíu milljónum íslenskra króna.

„Mikið, mikið minna,“ segir Jón Sæmundsson, framkvæmdarstjóri EnnEmm auglýsingastofunnar, sem á stærsta heiðurinn af auglýsingunni. „Upphæðin er mjög langt frá áttatíu milljónum og þetta er alls ekki dýrasta auglýsingin sem gerð hefur verið á Íslandi,“ útskýrir Jón sem sagðist vita um að minnsta kosti eina dýrari auglýsingu.

Hann vildi ekki gefa upp hversu mikið breska stórstjarnan hefði fengið borgað fyrir þessar þrjár leiknu auglýsingar auk blaðaauglýsingar sem birtast á næstu dögum því slíkt væri trúnaðarmál.

„Það liggja ekki fyrir endanlegar tölur en þetta voru ágætis dagslaun og Cleese horfði á þann höfðarfjölda sem sæi auglýsinguna,“ segir Jón en ólíkt því sem margir hafa haldið þá eru þessar auglýsingar eingöngu hugsaðar fyrir íslenskan markað. Til gamans má geta að Orkuveituauglýsingin, sem fékk á baukinn í lok Skaupsins, kostaði 15 til 18 milljónir og telst meðal dýrustu auglýsinga sem gerðar hafa verið fyrir íslenskt fyrirtæki.