Alkmaar í 2. sætið

Grétar Rafn Steinsson lék síðustu 20 mínúturnar með liði AZ Alkmaar sem komst í dag í 2. sæti hollensku úrvalsdeildarinnar í fótbolta með því að sigra Feyenoord 1-0. Leikurinn var afar fjörugur og fóru bæði lið með fjölda færa forgörðum en úrslitin þýða að liðin höfðu sætaskipti í deildinni.

Þegar fimm leikjum er ólokið er PSV Eindhoven með 73 stig eða 9 stiga forskot á toppnum eftir 1-0 sigur á Nijmegen í gær. Alkmaar er með 64 stig og Feyenoord í þriðja með 63 stig.

Arnar Þór Viðarsson var ekki í leikmannahópi Twente sem gerði 1-1 jafntefli við botnlið Roosendaal í dag. Twente er í 8. sæti með 42 stig. Ajax tapaði fyrir Groningen og er í 4. sæti með 50 stig, einu stigi ofar en Utrecht sem vann 1-0 sigur á Sparta.