Andlit norðursins í Vestmannaeyjum

Í sumar gefst Vestmanneyingum og gestum þeirra tækifæri til að virða fyrir sér ljósmyndir Ragnars Axelssonar sem komið hefur verið fyrir utan á salthúsi Ísfélags Vestmannaeyja við Kirkjuveg og Strandveg.

Sýningin Andlit norðursins verður formlega opnuð föstudaginn 21. júlí kl. 15.00 með ávarpi bæjarstjóra, Elliða Vigissonar. Sýningin er sú sama og Edda útgáfa með stuðningi KB banka setti upp á Austurvelli í Reykjavík sumarið 2005 og hátt í 200.000 manns sáu. Myndirnar eru úr bókinni Andlit norðursins sem komið hefur út á fjórum tungumálum og hlaut frábærar viðtökur bókakaupenda auk þess sem kápa bókarinnar var valin besta kápa ársins 2004 í vali prentsmiðjunnar Odda.

Ragnar Axelsson er án efa einn þekktasti ljósmyndari Íslendinga. Hann hefur ótal sinnum unnið til verðlauna á árlegri ljósmyndaýningu Félags íslenskra blaðaljósmyndara, nú síðast fyrir skömmu þegar mynd hans af Davíð Oddssyni var valin fréttamynd ársins. Hann er einnig sá íslenski ljósmyndari sem sýnt hefur hvað víðast um heiminn, t.d. í London, Berlín, París, Hamborg og Köln og hafa sýningar hans í Þýskalandi vakið mikla fjölmiðlaathygli þar í landi. Fyrir dyrum standa sýningar víðsvegar um heiminn og hann hefur samið við frönsku bókabúðakeðjuna FNAC um að sýning með myndum hans ferðist um búðir keðjunnar næstu árin. Ljósmyndasýning með myndum hans í Vestmannaeyjum er því viðburður á alþjóðlegan mælikvarða.