Fyrstu íslensku eldflauginni skotið á loft

Eldflaug var skotið upp í fyrsta sinn frá Íslandi af Íslendingum í dag. Enginn varð þó fyrir skotinu enda til gamans gert.

Sumir hafa sérkennilegri áhugamál en aðrir. Þeirra á meðal eru pípari nokkur, vélsmiður og efnafræðinemi, þeir Smári Freyr Smárason, Steinn Hlíðar Jónsson og Magnús Már Guðnason sem eyða tómstundum sínum og skotsilfri í að smíða eldflaugar.

Fjöldi fólks var saman kominn á Vigdísarvöllum skammt frá Krýsuvík til að fylgjast með þessari fyrstu íslensku eldflaug sem skotið hefur verið á loft hér. Markmiðið var að ná henni upp í um það bil 1000 metra hæð, koma henni í 5-600 km hraða á um hálfri sekúndu og fá hana niður í fallhlíf í um 500 metra radíus frá skotstaðnum.

Og það tókst. Flaugin kom stráheil niður, náði 590 km hraða á hálfri sekúndu og fór upp í 1080 metra hæð við mikinn fögnuð viðstaddra.

En til hvers í ósköpunum að smíða eldflaug? "Þetta er bara gaman," segir efnafræðineminn Magnús. En þetta er dýrt hobbí, þessi flaug hefur kostað þá skólapilta 350-400 þús. kr. "En tilgangurinn er að smíða þrjár flaugar og ná hljóðhraða með þeirri þriðju, um 1200 kílómetra á klukkustund," segir Smári Freyr sem er forsprakki eldflaugasmiðanna. En hvað er fengið með því annað en fúttið? "Fúttið," svarar Smári og brosir í kampinn.