Watson óheimilt að koma inn fyrir 12 mílur

Framkvæmdastjórn Evrópusambandsins fordæmir hvalveiðar Íslendinga og segir að ef hún fengi að ráða yrðu hvalveiðar alfarið bannaðar að eilífu. Paul Watson, stofnandi Sea Shepherd-samtakanna, sem sökkti tveimur hvalveiðiskipum á níunda áratugnum, boðar komu sína á Íslandsmið, en honum er óheimilt að koma inn í íslenska lögsögu.

Framkvæmdastjórn Evrópusambandsins hvetur íslensk stjórnvöld til að taka ákvörðun sína um veiðar til baka. Ben Bradshaw, sjávarútvegsráðherra Bretlands, gagnrýndi hvalveiðarnar einnig harkarlega í fréttum okkar gær. Bradshaw sagði ákvörðunina óskiljanlega, ekki hvað síst vegna þess að gefin hefðu verið út veiðileyfi á langreið, sem væri í útrýmingarhættu.

Einar K Guðfinnsson, sjávarútvegsráðherra, segir að sér hafi ekki komið á óvart að Bradsaw væri andvígur Íslendingum í hvalamálum. Það hafi margt oft legið fyrir og væri eftir bókinni. Hins vegar hafi stóra-bróðurs tónninn í honum komið á óvart. "Ég held að hann hafi ekki gert sér grein fyrir að hann hefur enga stöðu til að tala svona til annarra þjóða. Hann getur haft skoðanir á málunum en hann hefur ekki rétt að mínu mati til að tala til þjóða eins og okkar með þessum hætti," sagði Einar.

Sjávarútvegsráðherra sagði skýringuna kunna að vera að Bradsaw hefði uppi rangar fyllyrðingar um að Íslendingar væru að veiða hvali úr stofnum í útrýmingarhættu og ef hann byggði skoðun sína á því, væri ekki óeðlilegt að hann hrapaði að röngum ályktunum. Aftur á móti hefðu verið leyfðar veiðar á stofni sem þyldi þessar veiðar og jafnvel meiri veiði.

Kanadamaðurinn Paul Watson, forseti umhverfissamtakanna Sea Shepherd, boðar komu skips frá samtökunum á Íslandsmið. En Watson og félagar hans sökktu tveimur hvalveiðiskipum í Reykjavíkurhöfn og unnu skemmdarverk í hvalstöðinni í Hvalfirði árið 1988. Honum var þá vísað úr landi eftir fanglesisvist og settur í ótímabundið endurkomubann til landsins. Hann má því ekki koma inn fyrir íslenska landhelgi, sem nær 12 mílur frá landi. Watson getur hins vegar verið um borð í skipi frá 12 mílum út að 200 mílum, svo framarlega sem það skip tilkynni sig með löglegum hætti inn í efnahagslögsöguna og uppfylli almenn skilyrði. Breski sjávarútvegsráðherrann sagði í gær, að veiðar Íslendinga myndu verða til þess að draga úr áhuga almennings á að koma til Íslands og til að kaupa íslenskar vörur.

Sjávarútvegsráðherra telur að yfirlýsingar breska ráðherrans skaði ekki samskipti Íslendinga og Breta. Bradsaw hafi hins vegar sett fram dulbúnar hótanir um að þetta gæti haft áhrif á tvíhliða samskipti þjóðanna. Þegar hann fari yfir málin í heild sinni sagðist Einar ekki trúa öðru en Bradsaw kæmist að sömu niðurstöðu og allir skinsamir menn hljóti að gera.