Líður eins og dauðadæmdum manni

Larry Brown, þjálfari New York Knicks í NBA, á ekki sjö dagana sæla um þessar mundir. Hann stýrir nú æfingabúðum liðsins í borginni og undirbýr það fyrir næsta tímabil, en þegar hann hitti blaðamenn að máli í byrjun vikunnar var ekki gott hljóð í honum.

"Mér líður eins og dauðadæmdum manni," sagði Brown, en hávær orðrómur hefur verið á kreiki lengi um að hann verði látinn fara frá félaginu eftir skelfilegan árangur í vetur. New York vann aðeins 23 leiki en tapaði 59 og blaðamenn í New York telja sig hafa heimildir fyrir því að eigandi liðsins sé að íhuga að kaupa Brown út úr samningi sínum.