Tottenham að landa Berbatov?

Breskir fjölmiðlar greina frá því í dag að úrvalsdeildarlið Tottenham sé nálægt því að landa búlgarska framherjanum Dimitar Berbatov frá Bayer Leverkusen fyrir hátt í 11 milljónir punda. Berbatov var í hópi markahæstu manna í þýsku úrvalsdeildinni í vetur en vitað er að framherjinn knái vill skipta um umhverfi fyrir næstu leiktíð.

"Tottenham hefur sett sig í samband við okkur og virðist tilbúið að greiða fyrir hann ásættanlegt verð. Það yrði okkur mikið áfall að missa jafn sterkan leikmann og Berbatov, en hann vill prófa eitthvað nýtt og því er líklega ekkert við því að gera," sagði Rudi Völler, yfirmaður knattspyrnumála hjá Leverkusen. Berbatov er samningsbundinn Leverkusen til ársins 2009.