Auðvelt hjá Arsenal

Arsenal vann auðveldan 3-1 sigur á Manchester City í ensku úrvalsdeildinni í kvöld og setti með því mikla pressu á granna sína í Tottenham fyrir lokaumferðina í deildinni, en liðin berjast um fjórða sætið sem gefur sæti í meistaradeildinni. Jose Antonio Reyes skoraði tvö mörk á sex mínútum eftir að hann kom inn sem varamaður í síðari hálfleik og tryggði Arsenal 7. sigurinn á City í röð.

Botnlið Sunderland vann fyrsta heimasigur sinn á leiktíðinni í kvöld þegar liðið bar sigurorð af Heiðari Helgusyni og félögum í Fulham. Lokatölur urðu 2-1 fyrir Sunderland. Anthony Le Tallec og Chris Brown skoruðu mörk Sunderland en Tomasz Radsinzki minnkaði muninn fyrir Fulham. Heiðar Helguson spilaði allan leikinn fyrir Fulham.