Skrifar undir stóran bókasamning

Framherjinn knái Wayne Rooney undirritaði í gær stærsta bókasamning sem sögur fara af þegar íþróttamaður er annars vegar, þegar hann samdi við Harper Collins útgáfuna um 5 bækur á næstu 12 árum sem gefa Rooney hvorki meira né minna en 5 milljónir punda í vasann.

Fyrsta bókin kemur í hillurnar í lok júlí í sumar og mun það verða ævisaga hans fram yfir HM í Þýskalandi í sumar. "Þetta verður kjörið tækifæri fyrir fólk að heyra mína hlið á málunum einu sinni, því oft þegar fólk talar við mig segir það að ég hafi verið allt öðruvísi persóna en það hafi gert sér í hugarlund. Fólk heldur að ég sé allt annar maður en ég er, en ég er í raun aðeins ungur maður sem leikur knattspyrnu. Í bókinni mun ég tala um fótbolta og aðra hluti í lífi mínu og ég er nokkuð viss um að það verða hlutir í henni sem eiga eftir að koma fólki á óvart," sagði Rooney.