Man ekki eftir að hafa orðið systrum sínum að bana

Maðurinn sem myrti systur sínar þrjár í Ósló í fyrrakvöld kveðst ekkert muna eftir að hafa orðið þeim að bana. Hann dvelur á geðdeild vegna þess að hann er enn í of miklu losti til að hægt sé að yfirheyra hann.

Yngri bróðir mannsins segir hann hafa átt við geðræn vandamál að stríða um nokkurt skeið en læknar hafi daufheyrst við óskum um að taka hann til meðferðar. Ekkert væri því hæft í þeim getgátum að um svonefnt heiðursmorð væri að ræða.

Lík systranna þriggja verða að líkindum send til Pakistans til greftrunar en fjölskyldan er ættuð þaðan.