Skákhátíð á Grænlandi hefst á þriðjudag

Hátíðin hefst í Tasiilaq, þriðjudaginn 1. ágúst. Tasiilaq, sem margir Íslendingar þekkja betur sem Ammassalik, er stærsti bær Austur-Grænlands.

Samkomuhúsi bæjarins verður breytt í skákhöll og haldin námskeið, æfingar, fjöltefli og hraðskákmót út vikuna. Þá munu Hróksmenn heimsækja leikskóla og munaðarleysingjaheimili í Tasiilaq og færa grænlenskum börnum gjafir frá velunnurum á Íslandi.

Í vikunni munu Hróksmenn að auki heimsækja lítil þorp í grennd við Tasiilaq, dyggilega studdir liðsmönnum Kátu biskupanna úr Hafnarfirði. Kátu biskuparnir munu meðal annars halda 3ja daga hátíð í Kuummiit, 300 manna þorpi. Þrjú þorp til viðbótar verða heimsótt og slegið upp hátíðum fyrir börn. Sigurður Pétursson, sem hefur viðurefnið ísmaðurinn, mun sigla með leiðangursmenn milli þorpa. Sigurður, sem er löggiltur veiðimaður á grænlenska vísu, gjörþekkir til á Grænlandi og hefur verið mikil hjálparhella við skáklandnámið.

Gert er ráð fyrir að tugir Íslendinga og Grænlendinga taki þátt í IV. alþjóðlega Grænlandsmótinu - Flugfélagsmótinu 2006. Meðal keppenda verður Róbert Harðarson, sem sigraði með yfirburðum á mótinu í fyrra, og íslenski stórmeistarinn Henrik Danielsen, skólastjóri Hróksins. Íslensk grunnskólabörn eru líkleg til að láta að sér kveða, en þau skipa sem fyrr stórt hlutverk í sendinefnd Hróksins.

Hrókurinn skipuleggur hátíðina á Grænlandi í samvinnu við Kalak, vinafélag Íslands og Grænlands. Aðalbakhjarl skáklandnámsins á Grænlandi er Flugfélag Íslands, en fjölmargir hafa lagt Hróknum lið með einum eða öðrum hætti.

Óhætt er að segja að listagyðjan leggi nú Hróknum lið í skáklandnáminu. Hulda Hákon myndlistarmaður mun stýra listasmiðju í Tasiilaq fyrir íslenska og grænlenska listamenn og verður sett upp sýning í vikulokin. Þá verður sýning í skákhöllinni á verkum Jóns Óskars og Tim Vollmer sýnir ljósmyndir frá Íslandi.

Hægt verður að fylgjast með hátíðinni á Grænlandi á www.hrokurinn.is.