Yfir hundrað manns slasaðir

Kona á þrítugsaldri fórst þegar jarðlest á fullri ferð ók aftan á kyrrstæða lest á lestarstöð í miðborg Rómar í gær. Meira en hundrað manns að auki slösuðust, þar af tíu alvarlega.

Áreksturinn varð klukkan níu í gærmorgun á neðanjarðarstöðinni Piazza Vittorio Emanuele II, sem er skammt frá aðallestarstöðinni í Róm. Björgunarmenn settu upp sjúkraskýli skammt frá lestarstöðinni til þess að hlynna að hinum slösuðu. Sumir farþegar í lestinni, sem ekið var á hina kyrrstæðu, segja lestarstjórann hafa farið yfir á rauðu ljósi skömmu áður en áreksturinn varð.