England

Englendingar eru í B riðli með Svíum, Paragvæum og Trínidad og Tóbagómönnum. Þeir eru fyrirfram taldir sigurstranglegastir í riðlinum enda mæta þeir til leiks með firna sterkt og stjörnum prýtt lið.

Englendingar eru eitt af bestu liðum keppninnar og til þeirra eru gerðar miklar kröfur um góðan árangur. Vonir áhangenda hafa þó líklega aldrei verið meiri en nú. Þeir vilja meina að þeirra tími kominn.

Sven Göran Eriksson knattspyrnustjóri tók við liðinu í janúar 2001, hann stýrði liðinu á HM 2002 og í Evrópukeppninni árið 2004. Nú er svo komið að hann hættir eftir heimsmeistarakeppnina og við tekur Steve McClaren stjóri Middlesbrough. Þessi stjóraskipti gætu orðið merkileg ef Eriksson tekst að vinna mótið.

Það kom mörgum á óvart þegar Eriksson valdi hin unga Theo Walcott í leikmannahóp liðsins ekki síst vegna þess að hann hefur aldrei leikið í efstu deild. Einnig eru aðalsóknarmenn liðsins að jafna sig eftir meiðsli þeir Michael Owen og Wayne Rooney. Enn er óvíst hvort Rooney geti leikið því hann ristarbrotnaði í leik gegn Chelsea á dögunum.

Ef Rooney nær sér ekki í tæka tíð má reikna með að mikið eigi eftir að mæða á Steven Gerrad fyrirliða Liverpool eða "captain fantastic" eins og hann er oft nefndur. Því hann gæti þurft að leika sem framherji í mótinu. Hann virðist nærast á spennu og leikur einna best þegar mest er undir, en hvað er stærra en sjálft HM gullið?

Fyrirliði: David Beckham

Lykilmaður: Steven Gerrad

Gætu slegið í gegn: Joe Cole og Theo Walcott