Flugfélagið Ernir fær nýja flugvél

Flugfélagið Ernir fær nýja flugvél af gerðinni Jetstream 32 til landsins síðdegis. Hún lendir í Reykjavík um kl. 18:00. Nýja vélin verður notuð í áætlunarflug á Höfn í Hornafirði og Sauðárkrók ásamt því að fljúga leiguflug. Hún er búin jafnþrýstibúnaði með auknum þægindum fyrir farþega og tekur 19 manns í sæti, segir í frétt frá félaginu.

Flugfélagið Ernir á fyrir tvær 9 sæta flugvélar. Þær verða notaðar í áætlunarflugið á Bíldudal og Gjögur í vetur en félagið hyggst verða komið með 19 sæta vél til að sinna Vestfjörðunum fyrir sumarið 2007.

Flugfélagið Ernir er að taka við áætlunarflugi á Höfn, Sauðárkrók, Bíldudal og Gjögur eftir áramótin og hefst flugið 2. janúar 2007. Ný bókunarvél verður tekin í notkun á www.ernir.is þann 15. janúar 2007.